Andesha e Hidayat

 اندیشہء ہدایت

 میں رو رہا تھا۔۔۔ گڑگڑا رہا تھا۔۔۔

یا اللہ! مجھے ہدایت عطا فرما!

یا اللہ! مجھے ہدایت عطا فرما!

یا اللہ! مجھے ہدایت عطا فرما!

 میری اس دعا کی تکرار سے تنگ آ کر

 میرے قفس میں موجود نفس یوں پھڑپھڑانے لگا

 گویا اس کا دم گھٹنے لگا ہو

 پھر یکا یک وہ زور سے چلایا

  ابے! سوچ لے کیا مانگ رہا ہے؟

 اگر واقعی ہدایت مل گئی تو۔۔۔؟

 میوزک ، ڈانس ، پارٹیاں ۔۔۔

 شراب ، شباب ، کباب ۔۔۔

 گرل فرینڈز ، فلرٹ ، افیئرز  ۔۔۔

 کنسرٹس ، قوالیاں ۔۔۔

 فیشن  ، فلمیں، ڈرامے ۔۔۔

  رشوت ، کھانچے ، کمیشن ۔۔۔ کک بیک ۔۔۔

بینک انٹرسٹ۔۔۔

 سارے اللے تللے چھوٹ جائیں گے۔۔۔

 زندگی کی ساری رونقیں ماند پڑ جائیں گی؟

 کیا فائدہ ایسی لائف کا جس میں لائف نہ ہو؟

 نفس کی اس تقریر سے  خوف کی سنسناہٹ میرے پورے جسم میں دوڑ گئی۔۔۔

 واقعی ہدایت مل گئی تو کیا ہو گا؟

 مجھے لگا میرے چہرے پہ داڑھی اگنے لگی ہے ۔۔۔

 میرے پائنچے ٹخنوں سے اونچے ہونے لگے ہیں۔۔۔

 مجھے اپنی بیوی کے بدن پہ عبایا اور چہرے پہ نقاب لگا نظر آنے لگا۔۔۔

 مجھے لگا میرے اپنے بینک اکاؤنٹس میں پڑی رقموں کی بدبو سے میری ناک سڑنے لگی ہے ۔۔۔

 مجھے اپنی معیشت کی کشتی ڈوبتی دکھائی دینے لگی ۔۔۔

 میرا حلق خشک ہونے لگا۔۔۔

  میرے آنسو تھمنے لگے ۔۔۔

 اور الفاظ مدھم پڑنے لگے ۔۔۔

 ہدایت  کی دعا میں اب بھی مانگ رہا تھا ۔۔۔

 لیکن اب

 زیادہ زور نہیں مار رہا تھا

 کہ اگر واقعی ہدایت مل گئی تو ۔۔۔؟؟؟

Zan Mureed

پہلی مرتبہ وہ مجھے جمرات پر نظر آئے۔ مناسب قد و قامت کے حامل تھے۔ چہرے پہ سجی سفید داڑھی نہایت بھلی معلوم ہو رہی تھی۔ بڑے جذبے سے کنکریاں مار رہے تھے۔ سات کنکریاں مار چکے تو پھر سات اور ماریں۔ خیال ہوا کہ شاید کسی اور نے اپنی رمی کرنے کے لئے وکیل بنایا ہو گا۔  پھر قربان گاہ میں دیکھا تو یکے بعد دیگرے دو دنبے ذبح کئے۔ ظاہر ہے قربانی کے لئے بھی بہت سے لوگ ذمہ داری لے لیتے ہیں، سو اس میں بھی کوئی غیر معمولی بات نہ لگی۔  اگلے روز طواف وداع کے لئے حرم پہنچا توطواف کے آغاز پر پھر وہ نظر آئے۔ میں طواف شروع کر رہا تھا اور وہ طواف مکمل کر کے ہجوم سے باہر نکل رہے تھے۔ لیکن پھر انہیں دوبارہ طواف کرتے ہوئے پایا۔ سخت تعجب ہوا کہ اس قدر ہجوم میں ایک ہی طواف کرنا مشکل ہو رہا تھا  اور یہ حضرت دوسرا طواف کرنےلگ گئے۔  بعد ازاں صفا مروہ کی سعی کے دوران پھر ان پر نگاہ پڑی ۔ مروہ پر سعی مکمل کر کے میں چپل اٹھانے  کی غرض سے صفا پر پہنچا تو انہیں ایک بار پھر سعی کی نیت کرتے اور پھر صفا سے مروہ کی جانب چلتے دیکھا۔ اب تو سخت حیرت ہوئی کہ حضرت ہر عمل دو دو بار کر رہے ہیں۔ خیال ہوا کہ پوچھنا چاہئے لیکن اس قدر ہجوم میں کہاں موقع تھا ان باتوں کا۔ سو اپنی راہ لی۔ لیکن ایک کھٹک سی دل میں برقرار رہی۔

حج کے بعد ایک روز میں ناشتے کی غرض سے بقالے کی جانب جا رہا تھا کہ وہ گلی میں داخل ہوتے نظر آئے۔ سلام دعا کے بعد باتوں باتوں میں پتہ چلا کہ قریبی عمارت میں ہی رہائش پزیر ہیں۔ میں نے کہا کہ آپ سے کچھ باتیں دریافت کرنا چاہتا ہوں۔  کہنے لگے : چلئے میاں ! ہمارے کمرے میں آ جائیے۔ ناشتہ ساتھ ہی کرتے ہیں۔ چنانچہ ان کے کمرے میں جا پہنچا۔ کمرے میں دو بستر پڑے تھے۔ اور باقی سامان سلیقے سے رکھا ہوا تھا۔

ناشتے کے دوران کچھ ادھر ادھر کی باتیں ہوتی رہیں۔ پھر انہوں نے کہا: میاں پوچھئے کیا پوچھنا چاہ رہے تھےآپ ؟عرض کی : حضرت ! حج کے ارکان کی ادائیگی کے دوران آپ  مجھے جا بجا نظر آئے۔ آپ کو ہر عمل دو دو بار کرتے دیکھا۔ بس یہی بات کھٹک رہی تھی ۔ اگر مناسب سمجھیں تو وجہ بتا دیجئے۔ سوال سن کر وہ ٹھٹک کر رہ گئے۔ پھر ان کی آنکھوں سے آنسو جاری ہو گئے۔ مجھے سخت افسوس ہوا کہ ناحق ان کو دکھی کر دیا۔ معذرت کرنےلگا ۔ کہنے لگے: نہیں میاں ! معذرت کیسی؟  بتائے دیتے ہیں آپ کو۔ شاید کچھ دل کا بار کم ہو جائے۔ پھر رومال سے آنکھیں پونچھ کے آہستہ آہستہ بتانے لگے:

میاں کیا بتائیں؟ بیگم کو حج کی شدید آرزو تھی۔ چھ ماہ پہلے کی بات ہے جب حج فارم جمع ہونے کی تاریخوں کا اعلان ہوا تو پیچھے لگ گئی کہ اس بار ہم بھی فارم بھر دیں۔ ہم نے کہا کہ بھئی ابھی وقت مناسب نہیں معلوم ہوتا ۔ بچیاں شادی کی عمر کو پہنچ گئی ہیں۔ رقم پس انداز کرنی شروع کر دینی چاہئے۔ آخر کو ان کی شادیاں کرنی ہیں۔لگی حدیثیں سنانے۔ کہ رسول پاک ﷺ نے فرمایا کہ حج فرض ہو جانے کے بعد حج کی ادائیگی میں جلدی کرنی چاہئے کہ جانے کب کیا رکاوٹ پیش آ جائے۔ پھر دوسری حدیث یہ سنا دی کہ جو حج کی ادائیگی کی قدرت رکھنے کے باوجود حج نہ کرے تو وہ چاہے یہودی ہو کے مرے یا نصرانی۔ پھر تیسری حدیث کہ حج مبرور کا بدلہ جنت کے سوا کچھ نہیں۔ پھر ایک دلیل یہ دی کہ پہلے کوئی کام رکا ہے ہمارا جو آئندہ رکے گا؟ جب جس چیز کی ضرورت پڑی، اللہ نے اپنے فضل سے پوری کر دی۔ آئندہ بھی کر دے گا۔ تو میاں سمجھو یوں حج کا فارم جمع کرا دیا۔ اور پھر یہاں چلے آئے۔

میاں مت پوچھو کہ بیت اللہ پر پہلی نگاہ پڑی تو کیا حالت ہوئی۔ کیسا سرور ملا۔ جھوم کے کہا :بیگم !اس ایک نگاہ میں ہی سارے پیسے وصول ہو گئے۔ عمرہ ادا کیا تو نشاط طاری ہو گیا۔ یہی خیال آتا رہا کہ عمرہ میں اتنی لذت ہے تو حج کیا ہو گا؟ حج کے انتظار کے دنوں میں طواف اور نماز کے لئے بیت اللہ کے چکر لگتے رہے ۔ اس دوران سرکار ﷺ کے دربار میں حاضری کا موقع بھی ملا۔ دیار نبی ﷺ سے فیض پا کر مکہ لوٹے تو مزید ایک عمرہ کا موقع ملا۔ ہر لمحہ اللہ کی رحمت کا ہالہ اپنے گردا گرد محسوس ہوتا تھا۔ میاں دعائیں تو یوں قبول ہو رہی تھیں گویا اللہ انتظار میں بیٹھا ہو کہ بندے کے منہ سے کوئی سوال نکلے اور وہ پورا کرے۔ اللہ اکبر۔ بھئی یقین مانو اسی کا ظرف ہے ورنہ کہاں ہم سا گنہگار کہ حج ایسے فریضے کی ادائیگی کی فکر کرنے کے بجائے ٹال مٹول اور بہانے بازیاں ، اور کہاں اس کا کرم۔ چاہتا تو وہ بھی ہماری دعاؤں کو ٹال دیتا ۔ لیکن نہیں میاں۔ بلا بھی لیا اور مان بھی گیا۔

دن یونہی مزے میں گزر رہے تھے۔ حج قریب آتا جا رہا تھا۔ وہ جمعہ کی شام تھی۔ آسمان پر کالے بادل گھر گھر کے آنے لگے ۔ پھر باران رحمت کا نزول ہوا۔ شدید بارش ہوئی۔ ہم  اور ہماری بیگم حرم کے بیرونی صحن میں تھے۔ لمحوں میں کپڑے تر بتر ہو گئے ۔ طے ہوا واپس رہائش گاہ پر چلا جائے۔ دو چار قدم چلے تھے کہ ہمیں خیال آیا کہ پانی کے تھرماس میں زم زم ختم ہو چکاہے۔ بیگم سے ذکر کیا تو جھٹ سے بولی : آپ ٹھہریں ۔ میں بھر کے لاتی ہوں۔ اور پاس ہی موجود زم زم کی ٹنکی کی جانب دوڑ پڑی۔ چند قدم ہی آگے بڑھی ہو گی کہ ایک دھماکہ ہوا اور اوپر سے ٹنوں وزنی کرین آ گری۔  میاں بس مت پوچھو آن کی آن میں کیا ہو گیا۔ ان کی آواز بیٹھتی چلی گئی۔میری بھی آنکھوں میں آنسو آ گئے۔ وہ حادثہ تھا ہی اتنا اندوہناک ۔ ایک لمحہ میں بیسیوں حاجی شہید ہو گئے تھے۔ اور بے شمار زخمی۔ حرم کا مرمریں صحن سرخ ہو گیا تھا۔ تعزیت کرنی چاہی لیکن الفاظ گویا حلق میں پھنس کر رہ گئے۔

کچھ دیر سکوت کے بعد انہوں نے ہی خاموشی توڑی: میاں! کیا بتاؤں کتنی خوبیاں تھیں اس میں۔ نہایت صابر شاکر ۔ وفا شعار ۔ سلیقہ مند۔ اللہ کی رضا میں راضی۔ بھاگ بھاگ کے ہماری خدمتیں کیا کرتی تھی۔ ہماری مرضی پہ اپنی مرضی کو قربان کر دیا۔ اپنی پسند نا پسند کوہماری پسند نا پسند کے مطابق ڈھال لیا۔ ہر خوشی غمی ، تنگی و وسعت  ، دکھ بیماری میں ہمارے شانہ بشانہ۔ وہ کہتی تھی کہ عورت کا مرد کے شانہ بشانہ چلنے کا اصل اور پسندیدہ طریقہ اس کی نظر میں یہی ہے۔

میاں ! نکاح میں قبول ہے کہا نا ۔۔۔ تو پھر ہر طرح سے ہمیں قبول کر کے دکھایا۔ ہماری جھڑکیاں اور نخرے برداشت کئے ۔ کبھی شکوہ نہ کیا۔ وقت بے وقت کی فرمائشیں پوری کیں۔ سفر حج کے سامان کی پیکنگ کے وقت ہماری ضرورت کی تمام اشیاء خود ہی جمع کر کے رکھیں۔ کپڑوں سے لے کر سیفٹی پن تک، اور عینک سے لے کر دواؤں تک ہر چیز کی موجودگی کو یقینی بنایا۔  تربیتی نشستوں میں باقاعدگی سے شرکت کا اہتمام کیا۔

اور یہاں آ کے تو وہ گویا بچھی ہی چلی جا رہی تھی۔ ہل کے پانی تک نہ پینے دیتی ہمیں۔ حرم میں حاضری کے بعد تھک ہار کر واپس آتے تو خود باوجود تھکان کے ہمارے پیر دبانے لگ جاتی۔ ہم روکتے تو کہتی کہ پہلے تو آپ صرف شوہر تھے، اب تو اللہ کے مہمان بھی ہیں۔ اللہ کے مہمان کی خدمت کرنے دیجئے۔ کبھی کبھی احساس تشکر سے بھیگی آنکھیں لئے ہمارے ہاتھ پکڑ کر کہتی کہ آپ نے مجھے اللہ کا گھر دکھا دیا۔ حالانکہ درحقیقت وہ ہمیں لے کر آئی تھی۔ ہاہ !وہ صرف ہماری دنیا ہی کے نہیں، آخرت کے بارے میں بھی فکر مند رہا کرتی تھی۔ میاں اللہ والی تھی ۔۔۔ بڑی اللہ والی۔ جبھی تو اللہ نے اسے پاک صاف کر کے اپنے پاس بلا لیا۔ شہادت کی موت عطا فرما دی۔ سیدہ خدیجہؓ کے قدموں میں جگہ عطا فرما دی۔ میاں اندازہ کرو کہ اس کی طلب کتنی سچی اور دھن کتنی پکی تھی! کیسے بلند درجات پا لئے۔ بچوں کی بھی ایسی تربیت کی کہ جب بچوں کو اس کی شہادت کی اطلاع دی تو وہ الٹا  ہمیں ہی صبر کی تلقین کرنے لگے۔ سچ فرمایا سرکار ﷺ نے کہ دنیا کی بہترین نعمت  نیک بیوی ہے۔ اس نیک بخت نے خدمتیں کر کر کے ہمیں اپنا مرید بنا لیا تھا۔

میاں حج پر ہر ہر رکن کی ادائیگی کے دوران اس کی کمی محسوس ہوئی ۔ سو اس کی طرف سے بھی رمی، قربانی، طواف وداع اور سعی کر دی ۔۔۔ بس یونہی اپنے دل کے بہلاوے کو۔۔۔  کہ ہم نے قدم قدم پر خود کو اس کی محبتوں اور وفاؤں کا مقروض پایا۔

سارے خاندان والے ہمیں زن مرید کہتے ہیں۔

چاہو تو تم بھی کہہ لو!

Your memories on Facebook

یور میموریز آن فیس بک

مائی گاڈ۔۔۔!

یہ فیس بک بھی ناں ۔۔۔

بہت گڑبڑ چیز ہے۔۔۔

اس کی یادداشت ۔۔۔ توبہ!

اس کا حافظہ۔۔۔ غضب!

بتائیے بھلا۔۔۔ !

سال دو سال پہلے ہم نے آج کے دن کیا شیئر کیا تھا،

یور میموریز آن فیس بک کے نام سے لا کے سامنے رکھ دیا۔۔۔ !

 مثال کے طور پر کل ہی کی بات لے لیجئے۔۔۔

ہماری ہی ایک پوسٹ ہمارے ہی سامنے لا کے رکھ دی کہ

یہ لو۔۔۔

یہ تم نے پچھلے برس آج کے دن شیئر کی تھی۔۔۔

گویا ۔۔۔

ہماری اپنی ہی کارستانیاں ۔۔۔

ہمارے اپنے ہی کرتوت ۔۔۔

ہمارے ہی سامنے رکھ کے ۔۔۔

ہمیں کہہ رہی ہو۔۔۔

اقْرَأْ كِتَابَكَ ۔۔۔ كَفَىٰ بِنَفْسِكَ الْيَوْمَ عَلَيْكَ حَسِيبًا ﴿سورۃ الاسراء ، آیت 14﴾

“لو پڑھ لو اپنا اعمال نامہ۔۔۔ آج تم خود اپنا حساب لینے کے لئے کافی ہو!”

آگے خود ہی سمجھ لیجئے!

اسلام کے سپاہیوں کے نام ایک خط

اللہ کے بندے عمر بن عبد العزیز کی جانب سے منصور بن غالب کے نام

میں نے تم کو اہل حرب سے اور ان اہل صلح سے جو لڑائی پر آمادہ ہوں ، جنگ کرنے کے لئے بھیجا ہے ۔ میں تمہیں نصیحت کرتا ہوں کہ ہر حال میں تقویٰ اختیار کرو کیونکہ اللہ کا تقویٰ بہترین سامان ، موثر ترین تدبیر اور حقیقی طاقت ہے ۔ سو اپنے اور اپنے ساتھیوں کے دشمنوں سے زیادہ اللہ کی معصیت سے ڈرو کہ گناہ انسانوں کے لئے دشمن کی تدبیر سے بھی زیادہ خطرناک ہے ۔ خوب جان لو کہ ہم جنگ میں اپنے دشمنوں پر محض ان کے گناہوں کی وجہ سے ہی غالب آ جاتے ہیں ورنہ تعداد و اسباب کے اعتبار سے ہم کسی بھی طرح ان کے ہم پلہ نہیں۔ اگر ہم اور وہ معصیت میں برابر ہو جائیں تو وہ قوت اور تعداد میں ہم سے بڑھ کر ثابت ہوں گے ۔ یاد رکھو کہ اگر ہم ان پر اپنے حق پر ہونے کے باوجود فتح نہ پا سکیں گے تو اپنی قوت کی وجہ سے بھی ان پر غالب نہ آ سکیں گے ۔ سو اپنے گناہوں سے زیادہ کسی کی دشمنی سے چوکنا نہ رہو نہ ہی معاصی سے زیادہ کسی اور چیز کی فکر کرو۔ یاد رہے کہ اللہ تعالیٰ کی جانب سے تم پر کچھ نگہباں مقرر کئے گئے ہیں جو تمہارے سفر و حضر کے افعال کو جانتے ہیں ، پس ان سے شرم کرو ۔

اور میں تم کو ہدایت کرتا ہوں کہ اپنے ساتھیوں سے حسن سلو ک کرو ، اور ان کو اللہ کی نافرمانی کر کے ایذا نہ پہنچاؤ ، بالخصوص ایسی حالت میں جبکہ تمہارا دعویٰ ہے کہ تم راہ خدا میں نکلے ہوئے ہو ۔ اور یہ مت سمجھو کہ ہمارے دشمن ہم سے گئے گزرے ہیں ، اس لئے گو ہم گناہگار ہیں ، لیکن وہ ہم پر غالب نہیں آ سکتے کیونکہ بہت سی قومیں ایسی ہیں جن پر ان کے گناہوں کی وجہ سے ان سے بد تر لوگوں کو مسلط کر دیا گیا ہے ۔ پس اللہ جس طرح تم اللہ تعالیٰ سے اپنے دشمنوں کے مقابلے میں مدد چاہتے ہو، اسی طرح اپنی ہوائے نفس کے مقابلے میں اس کی مدد چاہو ۔ میں بھی اپنے لئے اور تمہارے لئے اللہ تعالیٰ سےدعاگو ہوں۔

اور میں تمہیں تاکید کرتا ہوں کہ سفر میں اپنےساتھیوں کے ساتھ نرمی کا برتاؤ کرو۔ ان کو ایسی قطع مسافت پر مجبور نہ کرنا جو مشقت میں مبتلا کر دے ۔ سفر میں کسی ایسی منزل پر جہاں ان کو کچھ آرام کا موقع مل سکے ، قیام کرنے سے گریز نہ کرنا ۔ تاکہ جب وہ دشمن کے مد مقابل آئیں تو سفر کی تھکاوٹ کے باعث ان کی قوتیں متاثر نہ ہوں۔ وہ ایسے دشمن کے پاس جا رہے ہیں جو کہ اپنے سامان کے ساتھ اپنے گھروں میں ہی ہیں اور ان کی سواریاں سستائی ہوئی ہیں۔ تو اگر سفر میں اپنے ساتھیوں اور سواریوں کے ساتھ نرمی کا معاملہ نہ کرو گے تو ان کے دشمنوں کو زیادہ قوت حاصل ہو گی۔ لہٰذا میرا حکم ہے کہ ہر جمعہ ایک رات اور دن سفر نہ کرو تاکہ تمہارے ساتھیوں اور سواریوں کو آرام ملے نیز تم اس دوران اپنے ہتھیاروں کی مرمت بھی کر سکو گے۔

اور میرا یہ بھی حکم ہے کہ جب تم کہیں پڑاؤ ڈالو تو صلح کی بستیوں سے ہٹ کر قیام کرو نیز جن بستیوں میں امن و امان قائم ہے ان میں ، ان کے بازاروں میں اور ان کی مجالس میں تمہارا کوئی ساتھی نہ جائے بجز اس کے کہ جس کو اپنے دین اور امانت پر کامل بھروسہ ہو ۔ نیز ان بستی والوں پر ظلم نہ کرو ، نہ ہی کوئی ایسا کام کرو جو تم پر گناہ کا بوجھ لاد دے ، اور نہ ہی ان کو اذیت پہنچاؤ سوائے اس کے کہ شرعی مطالبہ یا واجبی حق ہو کیونکہ ان کا حق اور ذمہ داری ہے جس کو پورا کرنے کے لئے تم اسی طرح پابند ہو جس طرح وہ لوگ حقوق اور ذمہ کی پابندی کے مکلف ہیں۔ پس جب تک وہ لوگ اپنے حقوق کی ادائیگی پر ثابت قدم رہیں ، تم لوگ بھی ان کے حقوق ادا کرتے رہو ۔ اور صلح والوں پر ظلم کر کے جنگ والے ملکوں پر غلبہ حاصل کرنے کی کوشش نہ کرو ۔ اللہ کی قسم ! تمہیں ان لوگوں کے مال میں سے اتنا حصہ پہلے ہی دے دیا گیا ہے کہ اب مزید کی نہ کوئی گنجائش ہے نہ ضرورت ۔ اور پھر یہ کہ ہم نے تمہارے سامان میں کوئی کوتاہی بھی نہیں کی ہے اور نہ ہی تمہاری قوت میں کوئی ضعف رہنے دیا ہے ۔ تمہارے لئے سامان اچھی طرح جمع ہو گیا ہے ، تمہیں ایک منتخب فوج دی گئی ہے ، اور شرک والے ملکوں کی طرف تم کو مشغول کر کے صلح والوں کی طرف سے تمہاری توجہ ہٹا لی ہے ۔ اور ایک مجاہد کے لئے جتنا بندوبست مناسب تھا ، اس سے بہتر تمہارے لئے کر دیا ہے ۔ ہم نے تمہارے لئے قوت کی بہم رسانی میں کوئی گنجائش نہیں چھوڑی ہے اور بھروسہ بہرحال اللہ ہی پر ہے و لا حول و لا قوۃ الا باللہ۔

اور میری آخری ہدایت یہ ہے کہ جاسوسی کے لئے ایسے افراد کو مقرر کرو جو عرب اور اہل ملک میں سے ہوں اور جن کی صداقت اور اخلاص پر مکمل بھروسہ ہو کیونکہ دروغ گو کی اطلاع نفع نہیں پہنچاتی اگرچہ اس کی کوئی بات درست بھی ہو جبکہ فریب دہندہ درحقیقت تمہارے دشمن کا جاسوس ہے ، تمہارا نہیں۔ والسلام علیک۔

تلخیص : ابو شہیر

ماخوذ: تاریخ دعوت و عزیمت از سید ابوالحسن علی ندوی